عمنا (مودي) حب يتحدى الملل، فقرر يتسلى علينا... ويطلب من كذا واحد إنه يحكي عن خمس حاجات من جانبه المظلم مع إنه قرطسنا ومحكاش غير جانبين بس مضلمين والباقي عادي يعني، لكن مع ذلك... تحت أمرك! مع إنه والله كان موضوع صعب جدا.
1- يمكن فيه ناس كتير ممكن تشوف اني مغرور، لكن الواقع المرير اني بحتقر نفسي جدا! أنا نفسي مش عارف ليه! بس فعلا عندي ميل غريب للتقليل من إمكانياتي بوجه عام.
2- رغم إن عندي علامة صلاة قد كده لو شفتها هتقول علي شيخ جامع، لكن عندي عادة سيئة مش قادر أبطلها... كلام في سركم! مش بعتق أي بنت معدية في الشارع... ببص بصات سريغة خاطفة! نفسي فعلا أبطل الحكاية دي... إن شاء الله هبطلها!
3- قبل النوم بفكر في كل الأفكار الشيطانية اللي ما قدرتش افكر فيها أو أعملها وأنا صاحي... ومش هقول زي ايه!
4- منافق من الطراز الأول، فيه ناس كتير بحتقرها ومع ذلك بتكسف أبين لها ده! لحد هنا ما فيش مشكلة، المشكلة بقى اني لما بشوفهم بعاملهم زي ما يكونوا من أعز أصحابي، بكره نفسي قوي لما اعمل كده!
5- الحكاية دي تقيلة قوي على قلبي... بعملها بس عشان ما زعلش موودي... أي خدمة
أتسلى أنا كمان وأطلب من نور (المواطن الحر) إنه يقول 5 حاجات من جانبه المظلم!
13 تعليقات:
أول زيارة للمدونة .... تدويناتك لذيذة , واسلوبك جميل .... شد حيلك
...
ملحوظة ... يابختك ان عندك خمس حتت بس مظلمين
صدقني .. لست بهذا السوء كما تتصور
احمد
تصور ان تكشف بسهولة نقاط سوداء مظلمة وبمنتهى الصراحة ده يتطلب شجاعة من نوع خاص يمكن مش شايفها انت فى نفسك لكن كلنا شفناها ده جزء من اللى نعرفه عنك وانت متعرفوش
تحياتى
الاسئلة بتاعة اكر 5 حاجات وحشة فيك سهل اجابتها مع بعض الشجاعة طبعا
بس انك تعرف ايه الكويس فيك دى باه صعبة جدا
عارف رغم إن أنا اللي دبست موودي في التاج بس زعلانة دلوقتي إجاباتك صدمتني جدا رغم إني بشجعك على صراحتك دي بس مش عارفة بجد مصدومة.. ولو رجعت للتاج الأخير بتاعي يمكن تعرف السبب.
انت برج الاسد فعلا
شكرا لكم جميعا... وكلمتين لتسنيم:
طبعا مش هحاول أدافع عن نفسي، بس عايز أقولك حاجتين: الأولى إن التدوين زيه زي العمل الأدبي أحيانا، يحتمل المبالغات قليلا! والأسلوب بتاعه أحيانا يضخم صفات على حساب صفات تانية! دي حاجة. ثانيا: كلنا إنسان، والإنسان مش دايما عنده نفس المنظومة الأخلاقية. هقولك على حاجة، احنا عندنا دكتور في المستشفى مش ضروري أقول اسمه، مهمل جدا في شغله والموبايل بتاعه عليه دايما حاجات مش لطيفة، بحتقره، فعلا بحتقره... عشان كده هذا الرجل مش برضى حتى اسلم عليه. يعني مش بعمل معاه شغل النفاق! يعني كل حاجة ليها حدود برضه! وأنا مش دايما نفس الشخص، أنا قلت حاجات أحيانا بازبط نفسي بعملها! لكن ده مش معناه اني بهذا السوء. على فكرة اكتشفت من التاج الأخير بتاعك ان معظم سماتنا الشخصية والنفسية متشابهة لدرجة مدهشة!
أحمد انا بحيي صراحتك و ده معناه انك على اتصال قوى بنفسك و بتتكلم مع نفسك كتير, بس زي مانت بتقول ممكن الكلام يكون مضخم الموضوع و الحاجه الرابعه انا مش بعتبرها نفاق, دى دبلوماسيه و ذكاء اجتماعى مطلوب عشان المركب يمشى,و بحييك انك رديت بشجاعه و على فكره ده لوخده كافى اننا نعرف انت قد ايه انسان كويس
من امام كشك ام نسمه
عالم مودى - القاااااهره
انت مش وحش
لأنك اتكلمت عن اللي مش عجبك في نفسك وقلته بصراحه, وجميل جدا انك قلت ان دي صفات مش عجباك يبقي أكيد هتغيرها.
بصوا بقي يا جماعه بما ان الشمسي صاحبي فانا هدافع عنه وبما ان خير وسبله للدفاع الهجوم فيا ريت كل واحد كده عنده مدونه يدفع اتاوه الا وهي انه يقول الجانب المظلم في حياته ومش شرط يكونوا خمسه هاه مين بقي شجاع زي
الشمسي
ابو عمر.......
اجمل مافي البوست صراحتك المطلقه
كفي بالمرأ نبلاً ان تعد جوانبه المظلمه
بوست صريح......حقيقي بحسدك ولو اني في بين وبينك جانب مظلم مشترك..........بس دماغك ماتروحش لبعيد
تحياتي
ياراجل نص الحاجات اللى قلتها مش فيك وأنت بالغت فى نقد نفسك كالعادة
وبالنسبة للنظر للبنات تصدق مالحظتوش فيك قبل كده
ياخبيث
الغريب
لا لا لا ، استني هنا بقي، انا ما شفتش التاج ده قبل كدة يا احمد، هع هع هع، مسكتك... بقي مش بتعتق اي بنت معدية في الشارع؟ تؤ تؤ تؤ، طيب علي كدة بقي انا مش ناوية اقابلك ... هع هع هع
:)
خمسة جد بقي
اولا جوانبك المظلمة دي لذيذة خالص خالص يعني، مش عارفة ايه اللي خلاني اتبسطت لما قريتها، حقيقي مش عارفة
يمكن عشان كدة حاسة انك اقرب، بمعني انه احساس حلو لما تحس ان حد بعيييييييييد و انك لما تعمل حاجة كدة و لا كدة الحد ده ممكن يقف و يقول تؤ تؤ تؤ و فجأة تلاقيه واقف جنبك في نفس الصف و تحس انك فرحان و مزقطط عشان طلع فيكوا شبه من بعض و طلع زيك، بشر
يا احمد صراحتك مع نفسك دي، مش مع التاج و لا علي المدونة، شئ يحترم و ايا كانت الجوانب اللي عندك اللي انت مش راضي عنها فكلنا كدة، انت مش اوحش واحد يعني، و اكيد انت زيي و شفت اللي اوحش من كدة بكتيييييييييير، و مفيش وجه مقارنة اصلا... بس سيبك انت، انا ما توقعتش حكاية البنات دي، اصل انا شفت علامة الصلاة اللي بتقول عليها، هو انا قلتلك اني شفتك عالحقيقة قبل كدة؟ انا شفتك بجد و انت شفتني بس ما كنتش تعرفني، و مشيت عادي و انا اتكسفت اقوللك ازيك، خصوصا اننا كنا في الشارع و بعد الساعة 12 و احنا الاتنين كنا طالعين من فرح
:)
Post a Comment