قلنا إن المريض المصري يأتي إلى المستشفى محملا بكل أخلاقه خارجها. حسنا هو يأتي أيضا محملا بكل ما يقال عن إهمال الأطباء في مستشفيات مصر في برامج التوك شو، وعلى المساطب، وكان عليه إذن أن يبتكر ويتفنن في مقاومة الإهمال المتوقع!
اتصل مدير المستشفى بأحد زملائنا أطباء العظام. قال وهو يصرخ:
- فيه عندكم عيان اسمه (...) بيشتكي انه ما أخدش علاجه. شوف قصته ايه.
هم السبب! لا أعرف سببا وجيها واحدا لوضع تليفونات مدير المستشفى على لافتة كبيرة في أوضح مكان بالمبنى، "اشربوا بقى".
بعد البحث والتمحيص عن المريض، (نصف ساعة من البحث والتمحيص يا مؤمن) عثر عليه الزميل الفاضل. سأله:
- انت بتشتكي ليه يا حاج؟! أنا شفتك قبل كده؟
- وأنا لسه هستنى لما آجي وتهملوني؟!
الرجل اشتكى قبل أن يأتي للمستشفى – تمهيدا لحضور معاليه، وحسبي الله ونعم الوكيل!
هذا حل. الحل الثاني أن يبحث المريض عن أي قريب في المستشفى، طبيب، ممرضة، مساعد تمريض، ويبدأ في إملاء رغباته التي لا تنتهي.
كنت أقلب في التذاكر الخاصة بمرضى قسم المسالك، حين وجدت تذكرة لمريض يشكو من... ولا بلاش. المهم كان المريض "بلدياتي"، فقلت لنفسي "اعمل يا واد واجب مرة في حياتك وشوفه يمكن محتاج حاجة".
أقر الآن أن هذه كانت أسخف أفكار حياتي. ذهبت للرجل وقلت:
- أنا يا عم (...) بلدياتك لو محتاج أي حاجة قول.
تبادلنا التعارف واتضح أن الرجل يعرف معظم أعمامي وأخوالي، وتحول الرجل البلديات إلى كابوس مقيم.
كنت أخرج من استراحة المستشفى لأجده في وجهي يمسك تليفونه المحمول ويمده إلي وهو يبتسم أكثر الابتسامات التي رأيتها في حياتي اصفرارا ويقول:
- عمك (...) عايز يكلمك.
أتكلم مع عمي الذي يوصيني بالمريض خيرا فأسمع الكلمتين وأعيد للرجل تليفونه. بعدها بساعات يصادفني الرجل في طرقة المستشفى فيجري نحوي ويمد لي بتليفونه المحمول مع ابتسامة برتقالية:
- خالك (...) عايز يكلمك.
اللهم طولك يا روح!
- أيوه يا خالو... في عنينا والله، يا سلام؟! انت تؤمر.
وهكذا...
صرت أخاف من مغادرة استراحة الأطباء لأي سبب. أشعر أنني سأفتح صنبور المياه لأجد الرجل ينزل منه ماسكا هاتفه المحمول مع ابتسامته الملونة.
المشكلة أن الطلبات تأتي غالبا في منتهى السخف. وكانت أعصابي قد انهارت تماما حين قلت له وأنا أبتسم ابتسامات حمراء:
- هو انا يا حاج قصرت معاك في حاجة؟ مش انا اللي جيت وقلت لك أنا بلدياتك.
- الشهادة لله: أيوه.
- كان يوم اسود!
حل آخر. المريض المصري، الذي تعود أن ينافق عسكري المرور في الشارع، وضابط الشرطة في الكمين، ورئيسه في العمل، سينافق الطبيب أيضا.
- يا باشا والله انا بخف أول ما بشوفك، والله أنا بحبك انت بالذات دونا عن كل الدكاترة اللي هنا، والله ده حتى الدكتور (...) حب يغير لي على الجرح، ما رضيتش اقوم معاه عشان مستنيك.
لا تصدق حرفا واحدا من كل هذا، النقط أعلاه سيضع مكانها المريض أسماء مختلفة مع كل طبيب، وربما يسب ويلعن في أدائك مع أقرب ممرضة بعد انصرافك.
حل جديد: المريض بعد مدة من البقاء في المستشفى يعرف ترتيب الأطباء الوظيفي. يعرف رئيس القسم من المدير المناوب من.. من...
كنت قد أنهكت تماما من المرور على قسم المسالك في أحد الأيام. وتابعت كل مريض وعلاجه وقساطره وخلافه... وإذ بي أفاجأ بمرور لرئيس قسم المسالك في وقت غير متوقع على الإطلاق.
المهم أن أحد أولاد الكلب في عنبر المسالك، صرخ من الألم بمجرد رؤيته لرئيس القسم. الرجل كان "زي الفل" منذ لحظات. وعندما اقترب منه الدكتور صاح:
- يا بيه ما حدش عدى علينا من الصبح يا بيه!
- في سري: آه يا ابن الكدابة.
وهو يهم بالمغادرة قلت لرئيس القسم: "والله يا دكتور لسه طالع من عنده".
قال وهو يبتسم:
- عارف والله يا أحمد. احنا ما عندناش مرضى هنا؟
- ؟؟؟ !!!
- اللي عندنا دول ولاد وسـ….
ولا بلاش، الطيب أحسن.
13 تعليقات:
شوف يا ابو حميد، انا هانصحك نصيحة لله، ده انت حبيبنا يا باشا و انت احسن المدونين و كتاب القصة القصيرة، و انا ما باقراش لحد غيرك... هع هع هع
خمسة جد، بعد بوستين من بتوعك عن القرف اللي بتشوفوه في شغلكوا، انا مضطرة اشفق عليكوا، او عشان اكون دقيقة، علي الدكاترة اللي عندهم ضمير و اخلاق، و اللي مش ماشيين زي باقي القطيع ما هو ماشي و ممشي حاله، لان هما دول اللي هيعانوا في مجتمع اصلا مسوّس... البلاوي دي الظاهر انها في كل مؤسسة، مع اختلاف الاسماء طبعا... انا ما اعرفش انت بقالك كام سنة مستحمل، بس انا جهازي العصبي ما استحملش اكتر من سنتين في الجامعة و التانية كان فيها جزاءات و تحويل للتحيقيق كيدي و لم يفضي الي جزاء و غيره و غيره من قرف الدكاترة و الطلبة اللي شبه العيانين عندكوا كدة... كنت عايزة اقول ايييه؟ آه، النصيحة بقي، انا اتشعبطت في اول منحة قابلتني مع اني عمري ما حبيت آجي امريكا، اصلي دقة قديمة زي ما سيادتك عارف و عايزة اروح انجلترا، ما علينا، بس نار امريكا و لا جنة مصر، و انت طبيب، اول ما يفيض بيك( و ده بيعتمد علي قوة تحمللك للقرف و مدي استيعابك و وعيك باسبابه) دور علي اول طيارة سايبة مصر، روح بلد عربي بقي، اطلع منحة و خد شهادة، تحت اي مسمي، بس ابقي ابعد شوية
هي نصيحة نص كم، و الهروب مبدأ العجزة اللي زيي، بس بينفع الواحد لما يكون خلاااااص فاض بيه و محتاج بريك
يا خرابي عاللوك لوك... لا مؤاخذة يا دكتور، استحملني بقي، ما انت بلدياتي
;D
آه، قبل ما انسي... اكتر حاجة بحبها في كتابتك و اللي مش هابطل امدحها هي اسلوبك الهزلي اللي بتناقش بيه اي بلوة كبيرة زي اللي بتشوفها في شغلك كدة... باهلك من الضحك و باشيل الهم في وقت واحد، و ما عملش معايا كدة من الكتاب غير اميا حبيبي و الجاحظ و المويلحي الي حد كبيييير
تحياتي يا فنان
:)
طبعاً ياسيدي أي كلام ملوش لازمة من ناحيتين:
الأولى لأن حدث ولاحرج الأمور معهوده سيان
الثانية كم المدح اللي بالكوم واللي مبنكرش -لحسن تقولوا ببص ولاحاجة- هيمسح أي كلام آخر بأستيكة
إلا اني عندي إضافة صغيرة المرضى على سماجة الكثير منهم إلا انهم في اللنهاية مرضى ولكن مع العمل مع المرافقين إللي اتمنى أحياناً اني أأأ.... ولا بلاش
أحمد
ما عرفتش أمسك نفسي من الضحك وأنا باقرا الصراحة, على الرغم من إن كل اللي في البوست أنا عارفه بس فعلا استمتع بقرايته.. انت فعلا رهيب يا ابني
أنا مش مع إيزولد... إحنا مش هانسيب البلد يا أحمد, قاعدين على قلب الأغلبية المسوسة, أنا بادعوك للانضمام معي في جروب على فيس بوك نسميه إصلاح. أحمد البلد دي بلدنا حتى لو وحشة وناسها بالسماجة دي. إحنا في أي بلد تانية أغراب..
بوست موفق يا أحمد.. أسعدتني وأحزنتني
ملحوظة (تصميم شعار الجروب هايبقى عليك, والانضمام إجباري عليك انت ونور.. هابقى أكلمك في التفاصيل في أقرب مكالمة)
سلام
:)
مش انا اللي جيت وقلت لك أنا بلدياتك.
- الشهادة لله: أيوه.
- كان يوم اسود!
ههههههههه
والله يا احمد ربنا معاك
عارف المثل اللي بيقول مين شاف بلوة غيره هانت عليه بلوته ... أهو هوا دا عشان أبطل اعترض ع الفارما والباثولوجي مالهم .. حلوين وأمامير خالص ع الأقل مش هايطلعلي حد من الكتاب يقرفني كل شويه .. بس انت ايه رأيك انت ممكن نعمل في الخواجات ثواب ونصدرلهم الصنف المصري الفاخر دا أهو دا بقي عندنا منه كتير كتير كتيييير وفره في الانتاج يعني
بس عايز الحق .. الصراحه ساعات بيبقي عندهم حق في حاجات وكفايه انه بيبقي داخل مستشفي حكومي وزي مانت قولت بيبقي عنده حصيله هايله من خبرات الثقه في الأطباء ، تعرف .. أنا مابحبش اروح لدكاتره ... آه هو ا كده بقي
كان الله في عونك
هو ده المصري ، في أي مكان ما يصدق يعرف حد أو واسطة ويبدأ يتنطط ...بس هنعمل إيه مضطرين نتأقلم مع الواقع ونتعامل مع شتي الأصناف الفاخرة المفتخرة درجة أولي ودرجة عاشرة.
ربنا معاك
ديدي
ماشى...مشفقة عليك جدااااا
بس مشفقة اكتر بكتير اوى اوى على نفسيات الناس المشوهة اللى بتدفعهم لكدة
الفقر والجهل خلى الناس مش بتعرف تحافظ على انسانيتها...اللى بيعمل كدة من المرضى بيبقى بيحتقر نفسه جدا ومش شايف انه له قيمة عشان كدة بيضبش
انا متحيزة...عارفة
بس دى بلدى وانا بحبها وعايزة الناس هنا يبقوا ناس كويسين عشان هما فعلا كويسين بس ظروفهم وحشة
لازم كلنا نقف جنب الناس اللى بيفقدوا انسانيتهم ونرجعهالهم
ممكن على فكرة ودة مش كلام فارغ والله ممكن نحاول
ايه ده بقي؟ انت لسة ما عملتش الكويز اللي بعتهوللك؟ تؤ تؤ تؤ... يا شماتة ابلة ظاظا فيا
:(
يعني و بعدين، انتوا هتقلقوني عليكم ليه، انا هالاقيها منك و لا من عمرو... طيب هو و ما اعرفش ماله، انت مش بترد علي تعليقات و لا بتكتب جديد... لاحسن تكون ناوي تختفي انت كمان... يبقي كلنا بقي نجيب درفها و نقفل المدونات تضامنا معاكم، و لا ايه؟
اوففففف... هو تقدر تقول انا متغاظة شوية، لا شويتين و ... معلش علي الدوشة دي، بس يا رب تكونوا انتوا الاتنين بخير، انا بس بافرح لما باقرالكوا... بتونسوني و الله
:)
أنا موجود ولم أترك الفضاء الإلكتروني يا إيزولد، فقط كنت نوبتجيا ليومين، ودماغي تمتلئ بالهموم، وجدولي يمتلئ بالمهام
سأكتب قريبا بإذن الله
شالله يخليك للغلابة يا رب... الحمد لله انك لسة هنا... اما عن المهام و الهموم، فربنا يعينك... مش عارفة اقوللك ايه و الله غير ربنا معاك و انا هادعيلك من هنا، من بلااااااد الفرنجة
:)
عارف ...
ولو ماكنتش رديت علي أيزولد كنت هاجي انا اعمل هيصه هن بس كويس ان انت بخير عشان انا بقلق
ربنا معاك يا احمد يا شمسي ويوقفلك ولاد الحلال قول آمين
:)
ههههههههههه
مش عارفه ليه يا احمد انت بقيت دكتور؟
سؤال والله بسأله لنفسى وانا بقرالك..دايما ساخط كده على كل حاجه
معاك حق آه
بس مش كده يابنى بالراحه على نفسك
المهم ماعلينا البوست تحفه
وخفة دمك كالعاده باينه اوى
المهم انت اخبارك ايه؟كويس
طيب تمام
انا جيت بس اقولك كل سنه وانت طيب يا دوك..ويارب يكتر مرضاك
هههههههههه
ممممم ... مافيش بوستات جديده يبقي انت اكيد مشغول لشوشتك .. ربنا معاك يا أحمد ويرزقك بعيانين كويسين كده ع العيد ولو اني مش عارفه ازاي يعني
:)
ثانيه واحده ..
"ايه يا منى الرغي دا انتي ما بتعرفيش تقعدي ساكته شويتين .. حاجه غريبه والله !!"
طيب انا جيت أعيد عليك واقولك كل سنه وانت كل سنه وانت طيب
Post a Comment